Udalak Kutxabankeko Ekogunerekin batera bultzatutako Ontziratu zaitez! kanpaina bere bidea egiten ari da Elgetan. Orain dela bi aste hasi ziren plastikozko ontziak banatzen Amagoia arrandegian, Goikoetxe harategian eta Bea Bouzasen Ugari dendan. Udalak aditzera eman duenez, denbora horretan 300 bat ontzi banatu dituzte herritarren artean.
Arrandegian 120 bat banatu dituzte, harategian 60 bat eta Ugari dendan beste 60. Kanpainak martxan jarraitzen du, eta ontziak banatzen jarraituko dute arrandegian eta harategian. Herriko plazan ere banatu zituzten ontziak aurreko barikuan. Udalak aditzera eman duenez 60 bat ontzi banatu zituzten egun hartan.
Ontzien erabilera
Merkatariak bat datoz: herritar batzuk hasi dira banatutako plastikozko ontziak erabiltzen, baina sumatzen dute ohitura falta handia dagoela oraindik. Erosleek ohitura hartzea denbora kontua dela uste dute. Amagoia arrandegian banatu dira ontzi gehien, eta badirudi bertan erabiltzen direla gehien. "Erosoa da eta arrain mota ezberdinak nahastu daitezke. Okela ez", esan digu erosle batek.
Udalaren balorazioa
Ekimenaren balorazio positiboa egin du Udalak. "Erosketak egiteko orduan banatutako tupperrak edo etxean dituztenak erabiltzera animatu gura ditugu elgetarrak", esan du Oxel Erostarbe alkateak. "Eskerrak eman gura dizkiegu kanpainan gurekin bat egin duten merkatariei".