Amaitzear daude auzo-konposta egiteko hiru gune berrien eraikitze-lanak Torrealdean zein Uruburun. Udaletik jakitera eman dutenez, ordea, ez dira irailera arte erabilgarri egongo. Aurretik, batzarra egin gura du Udalak hondakin organikoa auzo-konposta bidez kudeatzeko izena eman duten familietako ordezkariekin, eta oporrak tarteko irailerako deitu dute batzar hori. "Auzo-konposta guneak erabiltzeko derrigorrezkoa da batzar horretan parte hartzea", adierazi du Oxel Erostarbe alkateak. "Batzar horretan konposta egiteko oinarrizko ikastaroa, eta auzo-konposta guneetako oinarrizko arautegia aurkeztuko dugu", eman du jakitera.
Batzarra irailaren 4an
Batzarra iraileko lehenengo eguaztenean egingo dute, 19:00etan, udaletxeko osoko bilkuren aretoan. Uneotan Elgetako 30 familiak daude auzo-konposta egiteko prest. Interesatu gehiago balego irailaren 1era arteko epea dago udaletxean izena emateko.