Vermican enpresako Joseba Sanchezek bisita horietan erabiltzaileen zalantzak argitu, konpostagailuaren egoera ikusi, eta konpostaren lagin bat hartzen dutela azaldu du. Lagin hori, gero, laborategira eramaten dute ph-a, hezetasuna eta batez ere gazitasuna neurtzeko.
Orokorrean, erabiltzaileen zalantza edo kezka nagusiak bi direla kontatu du Sanchezek. "Lehenengo eta behin sortu daitezkeen arazoen inguruan galdetzen du jendeak: eltxoak, karraskariak, usaina... Beste multzo handi bat osatzen dute konposta ondo egiten ari ote diren jakin nahi dutenak".
Bi dokumentu
Bisita egin ostean erabiltzaileak bi dokumentu sinatzen ditu: bisita ziurtagiria alde batetik, eta hondakin organiko guztia konpostatzeko konpromisoa jasotzen duen agiria. Ezinbestekoa da konpromiso hori hartzea zaborraren tasan hobaria izateko.
Jakin ikuskatzaile hauek konposta egiten duten Debagoieneko erabiltzaile guztien etxeetatik pasako direla, beti ere aurrez hitzordua eginda. Momentuz, Arrasaten eta Aretxabaletan izan dira, eta orain Elgetan eta Antzuolan dabiltza. Adituak esan digu Debagoienean, orokorrean, ondo egiten dela konposta.