Boluntario taldea sortu nahi dute nagusiei laguntzeko

Boluntario talde bat sortzea da Udaleko gizarte zerbitzuen asmoa. Beharrak dituzten herritarrei laguntzeko boluntarioak izango lirateke. Udako oporren aurretik hasi ziren lehenengo bilerak egiten gizarte zerbitzuetako langileak, erretiratuak eta Caritasekoak; eta, badirudi egitasmoa forma hartzen dabilela. Herritar asko dago inguruko herrietako nagusien egoitzetan bizi dena; beste batzuk, eguneko egoitzara joaten dira; eta, etxean bakarrik bizi direnak ere asko dira. Bada, horiei laguntzeko asmoz sortu gura dute boluntario taldea.

Gipuzkoan bada horrelako zerbitzua ematen duen elkarte bat: Nagusilan. Bada, udaleko teknikariek haiekin bilerak egin dituzte nola lan egiten duten eta euren dinamika zein den ezagutzeko eta ikasteko.

Helburua jendeari laguntzea

Helburua da beharrak dituzten herritarrei laguntzea. "Jendeari laguntzea, solidarioa izatea… gizarte zerbitzuetatik bakarrik ezin da laguntza hori guztia eman, herritarren laguntza behar dugu jende horrengana gerturatzeko", dio Ainara Gabilondo gizarte zerbitzuetako teknikariak. Bide berri bat zabaldu nahi dute, herritarren arteko elkartasuna ahalbidetuko duen bidea.

Gutunak bidaliko dituzte

Hala, deialdia zabaldu dute herritarren artean. Datozen egunotan 50 eta 80 urte bitarteko herritarrei gutun bat bidaliko diete etxera. Proiektuan parte hartu gura dutenek bidalitako orria bete eta Udaletxera, erretiratuen elkartera edo Karitasera eraman beharko dute. Izena emateko azken eguna urriaren 30a da.


"Herritarron parte hartzea ezinbestekoa da egitasmo hau aurrera eraman ahal izateko", dio Gabilondok. Boluntarioek egin beharko dituzten lanak dira: pertsona hori bisitatzera joan, nagusi horrekin paseo bat eman… "Pertsonek duten beharren arabera erabakiko da zer egin", dio Gabilondok.

Beharrak aztertuko dituzte

Nagusilan araututa dago eta baditu astean zehar egin beharreko gutxieneko bisita batzuk. Elgetan, baina, baliteke arautegi hori bideragarria ez izatea. Hortaz, beharrak aztertu ostean erabakiko dute zela lan egin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.