Hitzaldian:
- Donostiako Liburutei Nagusiko sotoan izan zen hitzaldia eta kalejira batekin hasi zuen hitzaldia, Elgetak egingo lukeen moduan.
- Duela 50 urte hil zen Elgeta eta hark trikitiaren bidea zabaldu zuela esan zuen Goenagak: Hil zenean ez genuen haren argazkirik, diskorik, edo biografiarik. Sakabik, Auntxak, Martinek edo Lajak berak bazituzten diskoak, baina Elgetak ez.
- Goenagak, lehen aldiz Elgetaren pieza bat entzutean arrituta geratu zen: han baziren sekulako tonu aldaketak, parte instrumental desberdinak, bost edo sei kopla doinu desberdin... Nire aitak eta haren belaunaldiak miresten zuten gizonak bazuela zerbait harrigarria konturatu nintzen berehala. Aparta zen Elgeta erromeriarako.
- Elgeta nola integratu zen euskal gizartean, harrigarria da Goenagarentzat. Elgetaren figurak erakusten du argi asko euskalduna izatea zer den. Familia kanpotarra izanagatik, berak euskara ikasi zuen, eta ez hori bakarrik, euskal kulturaren barruan, trikitian ekarpen handiena egin zuen.
- Gerra aurretik herri txiki kontserbadoretan mugitu zen Elgeta. Gero Eibarrera, giro sozialistago batera, giro industrialago batera. Jazinto Rivas, sozialista da, balore ezkertiarrak defendatzen ditu eta fedegabea da. Antiklerala zen, eta gainera gerrara boluntario joan zen gorriekin. Pertsonaia atipikoa zen; ezagutzen ditugun trikitilari zaharren estereotipo guztiak apurtu zituen. Baserritar munduko balioreekin kontrajarriak dagoen ildoan aritu zen.
- Soinu txikiaren funtzio soziala azaldu zuen Goenagak eta Elgetaren izatearekin lotu. Dantzarako funtzioa zuen, bikoteak sortzeko, festarako aukera zen azken batean herri txikitan. Errepertorio berria sortu behar zen eta halaxe egin zuen Elgetak. Eibarko musika bandako zuzendariari pieza berriak erakusteko ordaindu baitzion sarritan.
Testua, Berriako Xabier Martinen artikulutik atera dugu.