Gaurkotasunari hainbat elkarrizketaren bidez helduko dio Goiatz Arana kazetariak Berbagai saioan. Ordu erdi iraungo du atal bakoitzak, eta martitzenetan ikusi ahalko da, 20:00etan eta 22:00etan.
Aurreko denboraldien bideari jarraituz, solasaldiak oinarri hartuta, askotariko gaien inguruan sakontzeko aukera izango dute ikus-entzuleek. Debagoieneko protagonistak jasotzeaz gain, bailaratik kanpoko elkarrizketatuak ere izango dira Goiena telebistako platoan, banaka zein binaka.
Lurralde Oreka Berdeko diputatu Xabier Arruti izango da martxoaren 3an emitituko den Berbagai saioko gonbidatua. Martxoaren 10ean, berriz, bi gonbidatu jasoko ditu Aranak platoan: Ane Elordi, Korrikako koordinatzaile nagusia; eta Maite Mendizabal, Debagoieneko koordinatzailea.