Mendiko lasterketak izango dira protagonista astelehenetako Harmailatik saio berezietan. Hain zuzen ere, otsailetik irailera bitartean Debagoienean egingo diren sei lasterketen laburpen zabala emango du Goienak, Xabi Urzelai kazetariak kontatuta. Horrekin batera, korrikalariek eta irabazleek esandakoak ere jasoko dituzte saioan.
Astelehenean emititu zen lehenengo saio berezia, Antzuolako 8 Milien ingurukoa. Eta, jarraian, bihar jokatuko den Arrasate-Udalatx mendi lasterketarena emango dute datorren astelehenean –martxoak 2–, 20:00etan eta 22:00etan. Mendi lasterketen inguruko hurrengo saio bereziak honako hauek izango dira: Gatza Trail, martxoaren 23an; Ahuntzen Mendi Lasterketa, martxoaren 30ean; Aloñako Igoera, apirilaren 27an; eta Ikazkin Trail, irailaren 14an.
Sei mendi lasterketen laburpenen emisio-egunak
ANTZUOLAKO 8 MILIAK: Emisio-eguna Otsailak 23.
ARRASATE-UDALATX: Emisio-eguna Martxoak 2.
GATZA TRAIL: Emisio-eguna Martxoak 23.
AHUNTZEN LASTERKETA: Emisio-eguna martxoak 30.
ALOÑAKO IGOERA: Emisio-eguna apirilak 27.
IKAZKIN TRAIL: Emisio-eguna Irailak 14.
Arrasate-Udalatx zuzenean
Horrez gain, biharko Arrasate-Udalatx mendi lasterketa zuzen-zuzenean jarraitu ahal izango da Goiena telebistan eta Goiena.eus webgunean, 09:15ean hasita. Mondraitz Kirol Klubaren, Goienaren, Abaoren eta Artemanen arteko elkarlanaren bitartez emitituko da zuzenekoa. Hori posible izateko, hamalau kamera erabiliko dira ibilbidean zehar; horietatik hiru helmugan jarriko dira eta gainerakoak ibilbidean zehar egongo dira sakabanatuta. Bestetik, eguraldiak laguntzen badu, Udalatxeko aireko irudiak ere jasoko dituzte zuzenekoan. Gainera, aurreneko korrikalarien jarraipena egiteko, sei boluntario ibiliko dira: mendiko bizikletan lau pertsona eta bi korrika. Arineketan arituko denetako bat da Iñigo Alzola izango da; Udalatxen azken zatian maldan gora eta Txukurrilloko jaitsieran grabatzea izango da haren eginkizuna. "Gure helburua ikusleek lasterketa ahalik eta ondoen jarraitzea izango da, eta, posible den heinean, irudi ikusgarriak jasotzea, lan exijentea baita korrikalariei jarraitzea", dio Alzolak.
Itzuliko azken etapa ere bai
Mendiko lasterketen ingurukoez gain, Antzuolako Goizperren hasi eta Bergaran amaituko den Itzulia Basque Countryko azken etaparen inguruko Harmailatik saio berezia ere emango du Goienak, apirilaren 13an. Hain zuzen ere, apirilaren 11n jokatuko da etapa hori.