Indarkeria Matxistaren Aurkako Nazioarteko Egunean, aldarrikapenez bete dira Debagoieneko kaleak azaroaren 25 iluntzean. Eguraldiak lagundu ez duen arren, hainbat eta hainbat izan dira deialdiekin bat egin duten herritarrak eta "indarkeria matxista lehen mailako arazo soziala" dela aldarrikatu dutenak.
Konplizitate sareen aurrean, erresistentzia feminista
Mugimendu Feminista Konplizitate sareen aurrean, erresistentzia feminista lelopean mobilizatu da Debagoieneko hainbat herritan. Autodefentsa feminista aldarrikatzen eta gauzatzen jarraituko dutela adierazi dute: etxean, kalean lantokietan zein jai guneetan. "Erantzun diezaiegun indarkeria sostengatzen duten konplizitate sareei, erresistentzia feministarekin". Arrasateko elkarretaratzean Aurre egingo dizueten emakumeak abestia abestu dute eta "Gora borroka feminista" leloa oihukatuz eman diote amaiera elkarretaratzeari.
Indarkeria matxistaren aurka, kaleak hartu
Deba Bailara Itaiak antolatutako ekitaldia Seber Altube plazan izan da eta hainbat lelo oihukatu dituzte elkarretaratzean: Emakume langile, antolatu eta Indarkeria matxistari aurre egin, besteak beste. Irakurketan adierazi dute indarkeria matxistarekin amaitzeko aukera bakarra "instituzioetatik kanpo eraikiko den antolakuntza iraultzailea" izango dela. Bengala gorriak piztuta eman diote bukaera Azaroak 25eko mobilizazioari.