Klima aldaketarekiko kalteberatasun handiena duen Gipuzkoako eskualdea da Debagoiena. Hala jaso zuten atzo, Jose Ignacio Asensio Jasangarritasuneko diputatuak eta Monica Pedreirak trantsizio ekologikoko zuzendariak, klima aldaketara egokitzeko lurralde eta udal planaren aurkezpenean.
Batez ere, Aizkorri-Aratz parke naturala da arrisku maila handiena duen gunea, baso eta nekazaritza sektoreetan, muturreko tenperaturek, lehorteek eta suteek izan dezaketen eraginarengatik. Horrez gain, arrisku ertaina duen eskualde bakarra ere bada Debagoiena, amezti eta pago baso azidofiloen presentziagatik, eta hauek tenperatura aldaketekiko eta urarekiko duten sentiberatasunagatik.
Larrialdi klimatikoari erantzutea helburu
EAEn aitzindaria den programak, 23 neurri jasotzen ditu "landa ingurunea eta natura ondarea babesteko", eta 2025-2030 aldia hartzen du. Klima larrialdiko testuinguruan datorren plana da, eta, besteak beste, hiri babesleku klimatikoak sortzea, gizarte eta osasun zerbitzuen sarea egonkortzea, nekazaritza dibertsifikazioa eta suteen aurkako prebentziozko basogintza planak jasotzen ditu bere baitan. "Larrialdi klimatiko batean, Gipuzkoak jarduten du. Berriz ere aitzindariak gara, klima aldaketara egokitzea ingurumen betebeharra dela ulertzen dugulako. Baina baita pertsonen bizitzarekiko, osasunarekiko eta duintasunarekiko betebeharra da", adierazi du Asensiok, Jasangarritasuneko foru diputatuak.