20. edizioa ospatuko du aurten Euskal Herriko Laborantza Ganbarak (EHLG) antolatzen duen azokak, Bihar ere laborari lelopean. Erreleboaz eta Euskal Herriko laborantzaren etorkizunaz hausnartuko dute, besteak beste, antolatutako hitzaldietan.
Aurtengo herrialde gonbidatua Euskal Herria da, eta lehen aldiz Euskal Herriko zazpi probintziatako laborarien topagunea izango da. Horregatik zazpi hedabide elkarlanean arituko dira zuzeneko saio berezi bat eskaintzeko: Goiena, Hamaika, Kanaldude, Aiurri, Anboto, Oizmendi telebista eta Goierri telebista. Zuzeneko giroaren berri emateaz gain, Euskal Herriko tokiko telebistekin elkarlanean hainbat erreportaje eskainiko dira Euskal Herriko laborantzaren egoeraren irudia osatu asmoz.