Industrian, ostalaritzan eta zerbitzuetan egin dituzten lanuzteez gain, Oñatin eta Arrasaten mobilizazioak deitu dituzte eguerdirako. Oñatin jendetza batu da, Foruen plazatik abiatuta egiten ari diren manifestazioan Genozidioarekin negoziorik ez lelopean, Oñati Palestinarekin taldeak deituta. Ikamak, berriz, elkarretaratzeak deitu ditu Arrasaten, Bergaran eta Oñatin, Genozidioa gelditu. Ikasleok Palestinarekin leloarekin.
Iluntzeko mobilizazioak
Iluntzean Debagoieneko herri gehienetan izango dira mobilizazioak, 19:30ean, Gernika Palestina herri ekimenak deituta: Arrasaten eta Bergaran manifestazioak egingo dituzte; Antzuolan eta Aramaion, elkarretaratzeak; eta Oñatin, Aretxabaletan eta Eskoriatzan burrunbadak. Guztiak izango dira udaletxeen aurrean –Aretxabaletan izan ezik, Mitarte kalean egingo dute–.
