Eskola Kirolaren bueltan iazko sententziak eragin handia izan du Gipuzkoako zenbait zonaldetan. Orain arteko ereduaz alderatuta, gaur gaurkoz neska-mutikoek ez dute eskola kirola derrigorrez egin behar, eta horrek orokorrean beheraka ekarri du parte-hartzaileen partetik, baina beherakada hori ez da denean berdina izan.
Ikasturte hasierako eskola kiroleko izenemateei erreparatuta, Leintz Eskola Kiroleko ordezkariek baikor egin zuten atzo berba, ikasturte hasierako jaian, eta familien, ikasleen, ikastetxeen eta bestelako eragileen partetik jasotako babesa nabarmendu zuten."Iazko sententziak urduritasuna ekarri zuen, ez genekielako horrek zer ekarriko zuen, eta ze aurreikuspen egin. Uste dugu familien partetik ideiak garbi geratu direla eta euren erantzuna ona izan dela, izan ere, Leintz Eskola Kirolean aurten 700 ikasletik gora egongo dira. Datu hauek ez dira behin-betikoak, jendea oraindik izena ematen dabilelako. Horrek esan nahi du %15-%18 bitarteko jaitsiera izango dugula iazko urteaz alderatuta, eta pozik gaude babesa jaso dugulako, ikusi dugulako jendeak sinisten duela proiektu honetan eta honek indarra ematen digu lanean jarraitzeko", adierazi zuen Julen Perales koordinatzaileak.
Ekitaldian izan ziren, baita ere, Arrasateko Udaleko ordezkariak, kirol teknikariak, Athloneko ordezkariak eta baita Arizmendi Ikastolako eta Leintzeko zenbait herri eskoletako ordezkariak ere. Hala, Arrasateko kirol zinegotzi Mikel San Migelen, Arrasateko Herri Eskolako ikasketa buru Enkarni San Julianen eta Arizmendiko zuzendari Illart Azkarateren adierazpenak ere jaso zituen GOIENAk –bideoan–.
