Domekan, hilak 28, aldarrikatuko da Albisteen Nazioarteko Eguna. Urtetik urtera gero eta hedabide gehiago biltzen dituen mundu mailako ekimena da, eta Goienako zuzendaritzak bat egin du kazetaritzaren balioa areagotzea helburu duen sentsibilizazio kanpainarekin. Aurtengo leloa honako hau da: Egia hautatu. Gertaerak hautatu. Kazetaritza hautatu.
Hain zuzen, arreta eman nahi zaio kazetariek herritarrei eta demokraziari zerbitzatzen dieten albiste eta informazio fidagarriak emateko duten rolari. "Goienaren balioek bat egiten dute ekimenak bultzatzen dituenekin. Sinistuta gaude konfiantzazko informazioa dela kazetaritzaren zeregina", adierazi du Goienako zuzendari nagusi Iban Arantzabalek.
Komunikabide independenteen erakundeak eta elkarteak konektatzea, elkarte berrien sorrera sustatzea, komunikabide eta elkarte independenteen interesak ordezkatzea eta sentsibilizazio kanpainak egitea ditu helburu ekimenak.
Identifikatu eta babestu
Faltsua edo manipulatua den informazioa sinesgarri eta fidagarri bihurtzeko aukerak handitu diren garaiotan, garrantzitsua da konfiantzazko hedabideak eta kazetaritza identifikatzea eta babestea.
Hain zuzen ere, Goienak bakoitzaren neurrira egokitzen diren kidetzak garatu ditu: kidetza Pertsonala, kidetza Digitala eta Etxekoak kidetza. Orain, gainera, 2025 bukatu arte kidetza doan izango da 2026ko kuota ordainduta.