"Egun guztian giro bikaina", izan zutela azaldu dute Zabaleta auzotik. 75 lagun elkartu ziren bazkarirako zein ondorengo erromeriarako eta "jatekoa bukatu arte" izan zen lanean txitxi-burduntzia.
Ohikoa duten moduan bolo jokoa izan zuten arratsaldean. Ordurako prest zegoen Zabaleta auzoko bolatokia. 40 bolari aritu ziren nor baino nor eta Anartz Esteban nagusitu zen bederatzi txirlo jota. Axier Azkarate izan zen bigarrena zortzi txirlo jota; hirugarren, berriz, Gotzon Uranga –txirlo kopuru berdinaren. Laugarren Beñat Oñederra izan zen –6 txirlo–, bosgarren Jabier Osoro –6 txirlo–, eta seigarren Luken Martino –6 txirlo–.
Zapatuan Euskal Herriko boleta-maratoia
Zapatuan, abuztuak 30, beste tiraldi bat izango da Zabaletako bolatokian. Euskal Herriko II. boleta-maratoia jokatuko da bertan. Egun berean inguruko hiru bolatokitan egingo dira tiraldiak: Zabaletan 12:00etan, Elgetako Salbador ermita ondokoan 17:00etan eta Elgetako bolatokian 20:00etan.
Sariak ere iragarri dituzte. Aurreneko bost bolari onenendako sariak egongo dira. Txapeldunak txapela, 150 euro eta bola eskuratuko ditu; bigarrenak, berriz, 75 euro eta urdaiazpikua. Hirugarrenak 50 euro eta gazta; laugarrenak, bi lagunendako bazkaria Elgetako Bolatoki tabernan eta, bosgarrenak, ortuko sorta eder bat. Horrekin batera, bolatoki bakoitzeko saria honakoa izango da: jasotakoaren %40 bolari onenarendako, %30 bigarren sailkatuarendako eta %20 hirugarren onenarendako.
Gaur da zapatuan Zabaleta auzoan egingo den bazkarian izena emateko azken eguna. Bazkaria 14:00etan izango da. Interesatuek Elgetako Bolatoki tabernan eman behar da izena. Menua da: errusiar entsalada, oilaskoa, postrea eta edariak. Prezioa 20 euro da.