Bailaran antolatzen diren kultura ekitaldien ia erdia –zehazki, %44,97– euskaraz da, Kulturklik-ek emandako datuen arabera, iazkoak aintzat hartuz gero. Horrez gain, hamarretik ia hiru gaztelerazko ekitaldiak dira (%26,63), bat baino gehiago elebitan (%13,58) da eta atzerriko beste hizkuntzaren batean programatzen dira gainontzekoak (%14,92), hala nola ingelesez, frantsesez eta alemanez. Hala ere, badago kultura ekitaldietako hizkuntza jakinekoa ez den zenbateko bat ere: hain zuzen ere, %10,13. Horrenbestez, litekeena da horietako asko euskaraz izatea, eta, horrenbestez, hizkuntzaren zenbatekoa handiagoa izatea; berdin elebitan diren ekitaldiekin ere.
'Kulturklik' eta datuen bilketa
Datuak beste modu batera emanda, berriz, zenbaki absolutuetara joz gero, Debagoienean antolatzen diren 751 kultura ekitaldietatik 337 dira euskarazkoak, berrehun gaztelerazkoak, 102 elebitan eginikoak eta 26 atzerriko beste hizkuntzaren batean: 30 ingelesez, bost frantsesez eta bat alemanez. Gainontzekoetako hizkuntza –denera, 76 ekitalditakoa– ez da jakinekoa.
Herrietara joz gero, euskaraz antolatzen dira kultura ekitaldi gehienak Debagoienean, Aramaion izan ezik –zehazki, hamalau euskaraz (%36,84) eta hamabost gazteleraz (%39,47)–, baina batik bat Leintz Gatzagan eta Antzuolan: hurrenez hurren, %66,67 eta %65,38 da euskaraz antolatutako kultura ekitaldien zenbatekoa bi herri horietan. Gutxien, berriz, Arrasaten eta Aramaion: %36,54 eta %36,84, hain zuzen ere.
Eskualdeen artean, Urola Kostarekin berdinduta
Gipuzkoako eskualdeen artean Debagoienean antolatzen dira euskarazko kultura ekitaldi gehien Urola Kostarekin batera: zehazki, antolatutako ekitaldi guztien %45 da euskaraz, eta hurrenez hurren dituzte: Goierri eta Tolosaldea (%42), Debabarrena (%39), Donostialdea (%29) eta Bidasoa Txingudi (%26).