"Kapitalismoak mundu mailako krisi ekosoziala eragin du. Bestelako eredu baten alde egiteko unea da, denon bizitzak erdigunean jarriko dituena; enplegua, zaintza lanak eta ondasuna era justuan banatuko dituena", adierazi dute LABetik.
Fokua Confebasken jarri du sindikatuak eta "ildo antisozialari" eusten diola adierazi; horren adibide jarri ditu, besteak beste, 23 hitzarmen sektorial —horietako asko feminizatuak— "berritzeari uko" egitea; "pribilegio fiskalei" eustea; eta "gutxieneko soldata propioa adosteko negoziazio mahaia irekitzeari ezezkoa" ematea.
Gutxieneko soldata eta pentsio duinak
Gutxieneko soldata eta gutxieneko pentsio duinak ezartzeko abian jarritako ekimenak izan ditu gogoan sindikatuak. Herri Ekimen Legegilea (HEL) EAEn tramitera onartu dutela gogorarazi dute, baina ez Nafarroan. Dena den sinadura bilketarekin jarraitzeko asmoa agertu dute.
"Bestetik, egungo legediaren arabera, gutxieneko soldata propioa ezarriko lukeen akordio intersektoriala negoziatzeko mahai bana deitu dugu EAEn eta Nafarroan, baina Confebaskek eta CENek uko egin diote mahaia eratzeari", azaldu dute.
Horregatik, borrokan jarraitzeko asmoa agertu dute eta maiatzaren bataren mobilizazioetan parte hartzea garrantzitsua dela adierazi: "Borrokaren bidez lortuko dugu langileon aldeko garaipen berriak eskuratzea. Maiatzaren Lehenean, patronal esplotatzaileari aurre egin eta bultzada berri bat emango diogu langile borrokari".
Debagoienetik antolatutako autobusak
Donostiako manifestazioa 12:00etan abiatuko da Easo plazatik. Hara autobusean joateko –prezioa, 10 euro– honako lekuetan eman ahal izango da izena:
- -LABeko egoitzetan.
- -Arrasaten: Irati Tabernan.
- -Oñatin: Arrano Tabernan.
- -Bergaran: Arrano Tabernan
Autobusaren irteera eta itzulera orduak honako hauek izango dira:
- -10:15 Arrasate (Zalduspe).
- -10:20 Elorregi.
- -10:30 Bergara (Ibargarai).
- -Itzulera 19:00 Donostiatik.
