Lan hitzarmenak berritu eta baldintzak hobetzea eskatzen dute ELA, LAB, Steilas eta CCOO sindikatuek, eta urtarrilean, otsailean, eta joan den asteko greba egunei jarraipena emango diote gaur eta bihar. Sindikatuek, ohar bidez, adierazi dute Euskal Autonomia Erkidegoan irakasleen %75ek baino gehiagok bat egin dutela grebarekin; GOIENAk bailarako eskoletan jasotako datuen arabera, Debagoienean irakasleen %60tik gora egin du lanuztea.
Arrasateko Herri Eskolan irakasleen %86ak egin du greba; Arrasate Institutuan, berriz, %30ak. Bergaran, San Martin Herri Eskolan, lanuztea %33koa izan da, Ipintza Institutuan %72koa eta Migel Altunan, %36,7koa. Oñatin, Urgainen, irakasleen %80ak egin du bat grebarekin; Oñati Institutuan, erdiak; eta Oñati Lanbide Heziketan %37,5ak.
Aretxabaletako Lanbide Heziketan %46ko jarraipena izan du; Kurtzebarri BHIn, %32koa; eta Kurtzebarri LHn irakasle guztiek egin dute bat, hau da, %100ekoa. Halaber, Eskoriatzako Luis Ezeizan %84koa izan da. Antzuolan, %75koa; eta Elgetan, %100koa.
Bihar ere greba eguna izango da eta Gasteizen manifestazioa egingo dute irakasleek. 11:30ean abiatuko dira Europa jauregiaren aurretik, eta Lakuan amaituko dute.
Negoziazioa etenda
Atzo kaleratutako ohar batean Hezkuntza Sailak deitoratu egin zuen sindikatuek aste honetarako aurreikusitako irakasleen greba-egunak bertan behera utzi ez izana. Haien esanetan, "grebak negoziazio-mahaiari berriro ekitea eta hezkuntza-sistema hobetuko duen akordio baten bilaketan aurrera egitea eragozten du".
"Proposamen zehatzetan aurrera egiteko, konfiantza eta egonkortasun-esparru bat behar da, elkarrizketa eta adostasunen bilaketa bultzatzeko, eta ikasleen ongizatea eta sistemaren kalitatea erdigunean jartzeko. Ildo horretatik, Hezkuntza Sailak adostasuna eta elkarrizketa lortu nahi dituela berretsi du eta berriz ere sindikatuei eskatu die elkarrizketa lehenesteko greba-deialdiaren aurretik, eta beste astebetez ikasleak eta haien familiak ez daitezen izan kaltetuak", diote.
Horren aurrean, sindikatuek salatu dute Hezkuntza Sailaren partetik "xantaia" jaso dutela, negoziaziorik ez dela egongo esan baitzitzaien: "Horrela izan da. Ez dugu ez deirik, ez mezurik, ez ezer jaso aste osoan eta Hezkuntza Sailean aukera izan du negoziazioarekin aurrera egiteko, baina ez du inongo borondaterik izan".
Sindikatuek ez dute baztertu greba gehiago deitzea; Hezkuntza Sailak bere aldetik "lasaitasuna" eskatu du eta lanuzteei eutsiz gero ez duela negoziatuko gaineratu.
