Bi lagun artista batera, munstroei aurre egiten

Aitziber Aranburuzabala Juldain 2025ko api. 1a, 11:11

Maria Oses idazlea eta Idoia Asurmendi musikaria. Argazkia: Maria Oses.

Maria Oses idazlea eta Idoia Asurmendi musikaria Munstroen bila: ohearen azpian aurkitutakoak aurkezten ari dira taula gainean; elkarrekin egin zuten ikuskizuna. Apirilaren 3an Bergaran izango dira eta hurrengo egunean, Eskoriatzan.

Orain dela hamabi urte Arrasateko Institutuan elkartu ziren Idoia Asurmendi aramaioarra eta Maria Oses arrasatearra. Lagun egin ziren, eta, ordutik hona, askotan egin dute elkarrekin lan; esaterako, Asurmendiren kantuetako hitzak idatzi izan ditu Osesek. Iaz, Loraldia jaialdiak bien arteko elkarlanean oinarritutako ikuskizun bat sortzeko proposamena egin zien. "Aukera hura baliatu genuen aspaldi buruan genuen zerbait egiteko: elkarrekin zerbait sortu eta oholtza gainean batera aurkezteko; eta hala sortu genuen Munstroen bila: ohearen azpian aurkitutakoak ikuskizuna", kontatu du Maria Osesek.

Askotariko munstroak

Elkarrekin sortu zuten lehen kantuak Munstroa du izena; iluntasunari beldurra dion munstro bati buruzkoa da. "Kantu horri tiraka, munstroak hartu genituen gai orokor gisa, ikuskizunaren haria izateko. Ertz askoko gaia da, eta landu nahi genituen gai asko jorratzeko aitzakia eman zigun. Munstroak aipatzerakoan burura etortzen zaizkigu fantasiazko munduetako izaki beldurgarriak, baina askotarikoak izan daitezke: badaude gure kaleetan oinez dabiltzan munstro ilunak, iluntasunari beldurra dioten munstro atseginak... Era askotan irakur daitekeen kontzeptua da", dio Osesek.

Maria Oses: "Ez da kontzertu bat; musikaren eta hitzaren arteko elkarrizketa da"

Ikuskizuna ez da kontzertu bat, ezta errezitaldi bat ere: "Musikaren eta hitzaren arteko elkarrizketa bat da. Bion artean sortu dugu, eta parada zoragarria izan da esperimentatzeko, jolasteko eta fantasiari tartetxo bat eskaintzeko".

Bergaran eta Eskoriatzan

Iazko Loraldia jaialdian Iruñaldia ekimenaren baitan estreinatu eta Arrasaten eskaini zuten abenduan. "Aldaketa txiki batzuk egin dizkiogu ikuskizunari. Bergaran apirilaren 3an 20:00etan izango gara eta egubakoitzean, Eskoriatzako Euskaraldia Batzordeak antolatuta, Zaldibar antzokian, 18:30ean hasita".

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak