Gizarte arloko gaien inguruan eztabaida publikoa sustatzeko asmoa du Gizadiberri programak –Orue Auzolana Fundazioa da sustatzailea–, gai jakin batzuen inguruko hausnarketa bideratzea, eta, hain zuzen ere, adinkeria da horietako bat; bada, hori gogoan, hitzarmena sinatu dute Goiena Komunikazio Taldeak eta Orue Auzolana Fundazioak. "Komunikazioaren eremutik abiatuta, lehen helburua da gizarteko gaien inguruko kontzientziazioan sentsibilizatzea komunikazioko profesionalak, eta, aldi berean, helarazten duten informazioaren bidez, herritarrak", azaldu du Ainara Arregik, Gizadiberri programako teknikariak.
Hain justu, abenduan sinatu zuten hitzarmena, Arrasaten, adinkeriaz ohartarazteko, kontzientziatzeko eta neurriak hartzeko, adinaren araberako –zehazki, zahartzaroari lotua– diskriminazioa aintzat hartuta; hori baita, adituen hitzetan, adinkeria, hiru arlotan jasan daitekeela nabarmenduta: erakundeenean, pertsonen artekoenean eta nork bere buruari eragindakoan.
Ikasitakoa helarazteko
Komunikazio arloko profesionalak formatzea da akordioan jasotako lehen urratsa, eta horretarako ikastaro bat egingo dutela adierazi du Monika Belastegik, Goiena Komunikazio Taldeko lehendakariak: "Gure gizartean diskriminazio modu ezberdinak daude, eta horietako bat da pertsona edadetuek nagusi izateagatik jasotzen duten bazterkeria. Alabaina, Gizadi- berrirekin sinatutako akordioari esker, Goienako kazetariok eta teknikariok ikastaro bat egingo dugu, gure kontzientzia pizteko eta sentsibilizazioan eragiteko". Ondoren, ikastaroan jasotakoa helaraztea izango da profesionalen ardura: "Ikastea, guk gure egunerokoan sortzen dugun eta gizarteak kontsumitzen duen eduki horietan adinkeria saihesteko eta baztertzeko".
Horrez gain, Belastegik erantsi du Puntua aldizkariko kolaboratzaile izango dela aurrerantzean Gizadiberri, adinkeriari –beste zenbait gairen artean– buruzko artikuluak idatziko baititu hilean behin.
Gidaren sorrera
Gizadiberrik, HelpAge Fundazioarekin elkarlanean, Adinekoenganako adinkeriarik gabeko komunikazio-gida garatu du, eta komunikatzaileen eskuetan dago dagoeneko; gaiaren inguruko zenbait gako biltzen ditu puntuz puntu.
