Langabeziak ez du gorabehera handirik izan hilabeteko epean bailaran, Gipuzkoako Lan Behategiak emandako datuetan oinarrituz gero. Hain zuzen ere, %7,88koa izan da langabezia-tasa azaroan, urrian baino 0,05 handiagoa –%7,83koa izan zen orduan– eta aldea, horrenbestez, ez da handia. Iazko aldi bereko datuarekin konparatuz gero, ordea, bestelakoa da egoera: zehazki, 2.314 pertsona zeuden lanik gabe Debagoienean 2023ko azaroan eta %7,54koa zen langabezia-tasa.
Herriz herriko egoerari erreparatuz gero, langabeen kopuruak behera egin du Antzuolan (-1), Aretxabaletan (-3), Elgetan (-3) eta Eskoriatzan (-10), eta gora, berriz, Arrasaten (+21), Bergaran (+11) eta Oñatin (+1). Aramaioko eta Leintz Gatzagako egoerari dagokionez, bost langabe baino gutxiago direnez, ez dago datu zehatzik.
Datu absolutuak aztertuz gero, aurreko aldietako joera errepikatzen da: Arrasate da langabezia-tasa altuena duen herria, hamarretik bat baino gehiago –%11,23– baitago lanik gabe. Hurrenez hurren: Bergaran, %7,63koa da langabezia-tasa; Eskoriatzan, %7,56koa; Oñatin, %5,63koa; Aretxabaletan, %5,62koa; Elgetan, %5,39koa; eta Antzuolan, %5,08koa.