Martxan da Arnasetik bideo-sormen lehiaketa, "gazteen sormena eta euren hizkuntza ohituren eta herrien inguruan gogoeta pizteko". UEMAk, Nafarroako Gobernuak eta Eusko Jaurlaritzak elkarrekin sustatutako egitasmo bat da, eta helburu du "euskararen arnasguneek duten garrantzia jendarteratzea", "euskararen biziberritzeari eta euskararen herriari egiten dioten ekarpena" nabarmenduta.
10-16 urte arteko gazteei zuzendutako egitasmoa da, baina euskararen arnasguneetako ikastetxeetako ikasleei dago mugatuta; edo, bestela, arnasguneetako ikasleak jasotzen dituzten eskoletako ikasleei. Banaka edo taldeka har dezakete parte, eta euren egiteko nagusia da euskarari lotutako istorioak kontatzea bi minutuko ikus-entzunezko lanen bidez.
Kategoriak eta erronkak
Hiru kategoria ditu lehiaketak, eta erronka bana izango dute. Hain justu, Lehen Hezkuntzako bosgarren mailatik seigarren mailara arteko ikasleen kasuan, maite duten herriko txokoren baterako bidea erakutsi beharko dute, eta eurentzako horren berezia zergatik den azaldu; DBHko lehenengo mailatik bigarrenera artekoek, berriz, euren herrietako urteko egunik berezienetako bat nola prestatzen den esplikatu beharko dute ikus-entzunezkoan; azkenik, DBH 3 eta 4. mailetakoek kazetari rolean jardun beharko dute, herritarrei galderak eginez.
Lanak irailaren 16tik urriaren 31ra arte bidali daitezke, eta publikoak azaroaren 5etik 15era arte izango du bozka emateko epea webgunean.
Sariak
Sariei dagokienez, 500 euroko saria izango da kategoria bakoitzean, eta baita publikoarena ere. IrrisarriLand-en, Durangoko Azokan, EITB-ko Goazen! eta Irabazi arte! telesailen produktuetan eta Gure Zirkuan gastatu ahalko dute sariko dirua, besteak beste.
