Lurraldebuseko indarkeria matxistaren aurkako protokoloa prestatzeko urratsak egiten dabil Gipuzkoako Foru Aldundia, eta horretan aurrera egitea da, hain justu, Maider Morras Arrasateko alkatearekin eta Izaro Elorza Oñatikoarekin eginiko batzarraren helburua, Azahara Dominguez diputatuaren hitzetan: "Protokolo horrek barne hartzen du zerbitzuak eskaintzea autobusen barnean, geralekuetan eta haietarako sarbideetan –azken biak udalaren eskumenekoak dira–", erantsi baitu emakume elkarteekin eta emakumezko erabiltzaileekin elkartu ondoren baieztatu dutela "emakumeek jasandako segurtasunik gabeko une batzuk ibilgailutik kanpo" gertatzen direla. Beraz, indarkeria matxistarik gabeko gune bilakatu nahi dituzte espazio horiek: "Beharrezkoa da garraio publikoa emakume guztientzako espazio seguru bat izatea, baita igo baino lehen ere. Horretarako, udalekin aritu behar dugu elkarlanean, denon artean emakumeen kontrako indarkeria mota denak zabaltzeko pausoak emateko".
Era berean, erabiltzaileen datuen berri ere eman du Dominguezek, eta hamarretik sei emakumeak direla azaldu du. Bada, haietako batzuekin izan da: "Sail honetatik eskuz esku lan egin nahi dugu Lurraldebusen unibertsoa osatzen duten eragileekin, langile zein erabiltzaile, eta zerbitzua ematen dugun udaletan, gizarteko esparru guztietan emakumeen eta gizonen benetako berdintasuna lortzeko bidean aurrera jarraitzeko". Garraio publikoa "pertsonen beharretara egokitu" behar dela uste du, baina, batik bat, "beharrezkoa" dela emakumezko erabiltzaileak "eroso eta seguru" egotea garraio publikoa erabiltzean.
