Kalitate ziurtatuko behiki-haragia modu arduratsuan kontsumitzea sustatzeko kanpaina jarri du abian HAZIk, Bonokela du izena kanpainak eta bi milioi euroko aurrekontua izango du. Ukrainako gerrak eragin handia izan du lehengaien prezioen igoeran, eta horrek, era berean, baldintzatu egin ditu elikaduraren balio-kateko hainbat jarduera. Elikadura kontsumo arduratsuaren alde egiten du kanpaina horrek, eta, horretarako, herritarrentzat eskuragarri izango dira Bonokela izeneko deskontuak.
Bost euroko deskontua
Bonokela deskontu-bonuak kanpainan parte hartzen duten harategi parte-hartzaileetan banatuko dira, eta hango bezeroek Eusko Label bereizgarriarekin identifikatutako behiki-haragia erostean egiten duten hamabost euroko erosketa bakoitzeko bost euroko deskontua izango dute; alegia, hamar euro ordaindu beharko dituzte erosketa horietan. Kanpainak urtarrilean hasi eta ekainera bitartean iraungo du, eta hilabete bakoitzean astebetez egongo da eskuragarri; urtarrilekoa astelehenean hasi zen, hilaren 29an, eta bihar arte arte egongo da deskontuak erabiltzeko aukera –otsailak 3–. Kontsumitzaileek zuzenean euren ohiko harategietan erosketak egitean eskuratu ahal izango dituzte deskontu-bonuak, kanpaina martxan dagoen aste espezifikoetan. Eusko Labeldun behiki-okela erostean automatikoki aplikatuko zaie deskontua. Parte hartzeko, erabiltzaileek formulario erraz bat bete beharko dute bonu fisikoetan euren datu pertsonalekin, edo afiliatuen txartel komertzialak erabili beharko dituzte, horrelako txartelak dituzten establezimendu laguntzaileen kasuan.
Kanpaina ez da soilik harategietan egongo eskuragarri; izan ere, Eroski, Uvesco Taldea, Carrefour, Alcampo, El Corte Ingles eta Supercor etxeetako haragiek ere izango dituzte Bonokela deskontuak.
Bailaran eragina
Deskontu-bonu horiek Euskal Herri osoan zeharreko harategietan egongo dira eskuragarri –guztira, 94–, eta horien artean, hamar Debagoienekoak dira: Aramaion, Bixente L. Azpilikueta harategia; Antzuolan, Gabilondo Arregi harategia; Arrasaten, Agirre-Etxe eta Landaluze harategiak; Bergaran, Leturia harategia; Elgetan, Barrenengua Okelak harategia; Eskoriatzan, Altuna Anaiak harategia; eta Oñatin, Garai, Jesus Odriozola eta Antxon harategiak.
