Aste honetan jokatu da Tolosako Nazioarteko Abesbatza Lehiaketa eta Esteban Urzelai oñatiarrak zuzentzen duen Suhar korua eguaztenean, hilaren 1ean, lehiatu zen. Lehiaketa honetan parte hartu duen euskal talde bakarra izan da. Atzo izan zen sari banaketa eta bost sari lortu zituzten: lehen sariak polifonia eta folklore saioetan, Publikoaren saria, Euskal obra baten interpretazio onenaren saria Ipar Haize Hotz Zuria abestiaren interpretazioagatik eta Txapelketako Kutxa Sari Nagusia. Azken sari horrekin, 2024ko irailaren 14an Bulgariako Varnan ospatuko den Abesbatza Kantuaren Europar Sari Nagusian izango dira.
Aste honetan, Esteban Urzelaik Hemen Debagoiena saioan egindako elkarrizketan adierazi zuen, helburu nagusia ez zela sari bat irabaztea, baizik eta "azken hilabeteotan egindako lan itzela erakustea eta oholtza gainean gozatzea". Taldeak sare sozialetan adierazi duenez, "sinistu ezinik" daude lortutakoarekin eta "denbora luzez" izango dute buruan atzoko egunez bizitakoa.
Era berean, aipatzekoa da Esteban Urzelairekin batera beste lau debagoiendar ere badaudela Suhar koruan; Ignacio Olaizola eta Txomin Maidagan arrasatearrak, Xabier Mugarza oñatiarra eta Aitor Garitano bergararra.
Kontzertu berezia, gaur, Tolosan
Gaur itxiko da Tolosako Nazioarteko Abesbatza Lehiaketaren egitaraua eta Suhar koruak kontzertua eskainiko du Tolosako San Frantzisko elizan, arratsaldeko zazpietan. Bi zatitan banatu dute emanaldia, eta lehenengoan, bederatzi abesti interpretatuko dituzte; bigarrenean, berriz, zazpi.