Polizia gehiegikerien 12/2016 Legearen bidez, Eusko Legebiltzarrean sortutako Balorazio Batzordeak hirugarren txostena argitaratu du. Txosten horretan, 66 espediente proposatu ditu batzordeak. Horietako 49k polizia-etxeetan tratu txarrak edo torturak jasan zituzten, eta zazpi Espainiako Poliziak edo eskuin muturreko taldeek –Batallon Vasco Español, Tripe A…– tiroz hildakoak dira.
1975ean eta 1982an
Azken horien artean daude Iñaki Etxabe arrasatearra, eta Victoriano Agiriano eta Maria Angeles Barandiaran senar-emazte bergararrak. Lehenengoa 1975eko urriaren 5ean hil zuten tiroz Kanpanzarren, bertako jatetxean. Batallon Vasco Español erakunde parapolizialak bere gain hartu zuen erailketa. Agiriano eta Barandiaran, ostera, polizia kontrol batean hil zituzten Gasteizen, 1982ko urriaren 16an.
"Azkenean, badator aitortza"
"Oso pozik hartu dugu berria. Azkenean, badator aitortza; ekonomikoa ere bada, gainera. Estatu Espainiarrak eta Espainiako gobernuak ez digute, oraindik, biktima izaera aitortu; Eusko Jaurlaritzak bai, ordea". Adierazi dio GOIENAri Olatz Etxabek, Iñaki Etxaberen alabak. Ildo beretik erantzun dio Iñaki Agirianok, Victoriano eta Maria Angelesen semeak, GOIENAren deiari. "Berandu dator, 41 urteren ostean, baina pozik gaude. Bada zerbait".
Ekitaldia, martitzenean
Eusko Jaurlaritzako Biktimen Zuzendaritzak biktima horiei aitortza egiteko ekitaldia antolatu du Kursaalen datorren martitzenean, 18:30ean. Olatz Etxabe eta Iñaki Agiriano han izango dira. Olatz Etxabek, gainera, hitza hartuko du. Agirianok zera adierazi du: "Halako aitortzak eta ekitaldiak oso eskertzekoak eta beharrezkoak dira. Orain, Estatu Espainiarraren aitortzaren zain geratzen da. Uste dugu zerbait ari dela mugitzen, eta itxaropentsu gara".
Aurretik, astelehenean eta martitzenean, Polizia Gehiegikerien Balorazio Batzordeak txostena aurkeztuko du Eusko Legebiltzarrean.