Hamar urteotan 130.000tik gora saski bete dituzte Nafarroa hegoalde eta erdialdeko produktuekin, Euskal Herrian bertan kontsumi daitezen. "Aldi berean, euskalgintzaren zakua ere oparo bete dugu —1.800.000 euro!— saskiek emandako mozkinekin. Eta, kanpainak joan kanpainak etorri, Errigoraren komunitatearen argazkia betez joan da ekimenera batu garen boluntario, ekoizle, kontsumitzaile, bidelagun eta onuradun berriekin.", adierazi dute Errigoratik.
Argazki erraldoia
Ohi legez, udazken betean etorri da aurtengo Euskarari puzka kanpaina, "sentsibilitate eta komunitateko kide guztiak bereziki batzen dituena, ekoizleengandik hasi eta euskalgintzako bidelagunenganaino". Hamargarren urteurrenean, gainera, Errigoraren komunitatearen argazki erraldoia atera nahi dute urteurrena ospatzeko: "Garenak, izan garenak eta izan nahi dugun guztiak batu nahi ditugu, hamarkada baten ostean, fase berri bati elkarrekin eta indarberrituta ekiteko".
Saski bakarra
Aurtengo saski-eskaintzak hastapenetakoari keinu egin gura dio, eta horregatik, 50 euroko saski bakarra osatu dute: "Originala: sorrerako saskiaren modukoa eta aldi berean joera berrikoa; biribila: zortzi ertz izan arren, Errigora dena, garena, biltzen duena (ekoizle taldea, euskalgintzarako ekarpena, auzolangileen emana,...) eta biderkatzailea: sinpletasunetik, parte izateari eta izan nahiari dei egiteko ahala duena". Saskiak eskatzeko epea azaroaren 9an bukatuko da.
Saski horretan batuko dituzte 23 ekoizleren ohiko bederatzi produktu ekologiko. Ekoizleak honako hauek dira: Ablitasgo kooperatiba, El Alcaravan (Argedas), El Agricultor (Lerin), Aristu (Irunberri), Axuribeltz (Iturgoien), Azanza (Abartzuza), Azpea (Irunberri), Biosasun (Discastillo), La casa del aceite (Cascante), Bardea (San Isidro del Pinar), La Churta (Allo), Ebrón (San Adrian), Enara (Arroitz), El Escolar (San Adrian), Gobeiaberri (Lodosa), Hazialdeko (hainbat herri), Iturri (Arroitz), Lezaun (Lakar), Martinelli (Beriain), Mendiko (Oibar), El Molinero (Arroitz), Monasterio de Cascante eta Urrutia (Uxue).
Saskiaren prezioa, 50 euro, produktu horiek dendan erosiz gero izango luketen prezioen parekoa da, eta kasu honetan, %25a euskalgintzarako ekarpena da. Hain zuzen ere Argia (Tutera), Erentzun (Biana), Ibaialde (Lodosa), Ager eremuko AEK, D ereduko lerroetara eta Agerraldia-ren ekimenak finantzatzera bideratuko dute.
Erosketak
Errigoraren webgunearen bitartez eska daitezke saskiak. Dena den, ohiko bideak ere erabil daitezke, kanpainako eskuorriak dakarren inprimakia beteta eta baita herriz herri kanpaina egiten duten ehunka boluntarioren bidez ere, euskara elkarteak, esaterako. Horrez gain, hamar urteotan eskaria egin duten pertsonei gutuna helaraziko diete. Eskaerak egiteko azken eguna azaroaren 9a da.
