Debagoienean Errekak Bizi Auzolanean ekimeneko kideek deituta, eskualdeko mailako bigarren erreka garbiketa egin dute goizean. Debagoieneko herri guztiek egin dute deialdia eta guztietan batu da jendea errekatik zikinak jasotzera. Aulkiak, ordenagailuak, hodiak, sokak, plastiko asko eta asko... denetik jaso dute.
Iaz baino zikin gutxiago
Deba Ibaian aritu direnek nabarmendu dute, iaz baino zikin gutxiago aurkitu dutela errekan. Leintz Gatzagan hasi eta Osintxura arteko tartean ibili dira hainbat gune garbitzen eta bai Aretxabaletan eta baita Bergaran ere, zabor gutxiago aurkitu dute gaur. Bi arrazoi nagusi egon daitezke horren atzean haien arabera. Bata, azken urteetan egin diren erreka garbiketek eman dituztela emaitza onak eta, bestea, euri gutxiko urtea izan denez, zikin gutxiago pilatu dela errekan.
Landare inbaditzaileen bila
Bergaran, erreka garbitzeaz gain, landare inbaditzaileak identifikatzen aritu dira parte hartzaileak. Antolatzaileek banatutako fitxa batzuen bitartez, zein landare inbaditzaile eta non aurkitu dituzten zehazten aritu dira.