Nafarroako Foru Erkidegoko Torneoaren ondoren, San Fermin Txapelketaren txanda da. Debagoienak ordezkaritza izango du txapelketa prestigiotsu honetan, izan ere, Leire Galeanok, Maialen Osesek eta Madalen Etxegaraik bertan parte hartuko dute. Bosgarren edizioa izango den honetan, Mendabian eta Elizondon ere txapelketako norgehiagokak jokatuko dira larunbat honetatik aurrera.
Galeano antzuolarraren bikotekidea Amaia Aldai izango da, Etxegaraiena Arrate Bergara eta Osesekin batera Olatz Arrizabalaga arituko da.
Zapatuan 18:30etan Mendabiako pilotalekuan lehenengo kanporaketak jokatuko dira. Bertan, Etxegaraik eta Galeanok finalaurrekorako txartela izango dute jokoan. Hain zuzen ere, finalaurrekoetan Oses oñatiarraren aurkaria larunbatean erabakiko da.
Finala Labriten
Finala uztailaren 8an jokatuko da Labrit pilotaleku ospetsuan. Jaialdia zuzenean jarraitzeko aukera egongo da ETB-1en bitartez.