Eraikin eta lokaletako garbikuntzako sektoreko lan baldintzak hobetzea eskatuz ekin zioten grebari astelehenean eta domekan emango diote bukaera. Debagoienean hainbat lantegi eta Udal zerbitzutan dabil izaten eragina ELAtik aditzera eman dutenez; besteak beste honako hauetan: Arrasaten, Polmetasa eta Saltoki lantegietan eta Garaia Teknologia Parkean; Oñatin Cegasa, Fagor Industrial, Natra, Ulma –Polimeroak, Packaging eta Forja– lantegietan, Txantxiku ikastolan eta kiroldegian; Bergaran, Errekan eta Mariaren Lagundia haurtzaindegian; Aretxabaletan Coprecin eta Udal zerbitzuetan; Eskoriatzan, Fagor Automation lantegian; eta Antzuolan, Matz-Errekan.
Lan baldintza duinak
Sektore feminizatua dela garbitzaileena adierazi dute sindikatutik eta "prekarietatea nagusi" dela. Langile horien egoeraren berri eman dute: "Erosahalmena %15 galdu dute. 1.180 euro gordineko hileko soldatak dituzte lanaldi osoengatik, eta sektoreko langileen %80k baino gehiagok lanaldi partzialak ditu". Are gehiago, azaldu dute patronalak ez diela beharginei KPI Kontsumo Prezioen Indizea bermatu nahi, eta baldintza horietan "langileak egiturazko pobretasun sistematikora kondenatzen" dituztela.
Sektoreak lan baldintza duinak izan ditzan baita erosteko ahalmena bermatuko duen soldatak ere, jo dutela grebara gaineratu dute eta lau puntutan jarri fokua: galdutako erosahalmena berreskuratzea eta hitzarmenaren indarraldian bermea izatea; partzialitatearen aurkako klausulak; plus bat izatea enpresa berean lantoki batean baino gehiagotan diharduten langileentzat; eta lan kargen erregulazioa.
