Katedra honen bidez asmoa da eragileen arteko elkargune bat sortzea, "ekonomia jakin bat lortzeko helburuarekin teoria, errealitate eta gizarte-mugimendu bat sustatzen ari direnen artean". Era horretan, eremu sozialean, ekonomikoan eta ingurumenean gizartearentzako emaitzak eta ekarpenak lortu nahi dituzte. Besteak beste, prestakuntza-programa bat sortu eta garatu nahi dute, nazioarteko topaketa batzuk antolatu eta gizarte-ekonomiaren inguruko komunitate birtuala sendotu lau urteko aldian.
Mondragon Unibertsitatearen lanari dagokionez, Arabako, Bizkaiko eta Gipuzkoako kooperatibismoari buruzko ezagutza, esperientziak eta ikerketa-ildoak partekatuko ditu, Ainara Udaondo Lanki Kooperatibismoaren Ikertegiaren zuzendariak adierazi duenez, bere zuzendaritzapean jardungo baitu unibertsitateak. "Gizarte-ekonomia eta kooperatibismoa bultzatzeko sare sendoa ehundu daitekeelakoan gaude. Gure identitatea da gure ekarpenen oinarria, euskal kooperatibismoa, eta ikuspegi hori partekatuko dugu, beste esperientzia batzuen bidez ikasteaz gain".
