Lehenengo saioan, Bergarako Mariaren Lagundia ikastetxekoek Ainize Lizarralde, El Conquistador del Caribe saioko iazko txapelduna elkarrizketatuko dute. Ikasleek galderak sortu eta banatu dituzte, eta, saioa osatzeko elkarrizketatuaren gertukoen bideo-mezuak grabatu edo lortu dituzte gonbidatuarentzat sorpresa moduan.
Platoan Alazne Suinaga, Elene Diaz eta Xabier Igartua arituko dira galderak egiten, eta errealizazioan, kontrol-gelan, saioa jarraitzen arituko dira Axell Ponce, Ariane Martinez eta Eneko Gurrutxaga. Gaur, 21:30ean eta 23:30ean izango da saioa ikusgai Goiena telebistan. [Lehenengo saioa]
Nerabeak euskarazko hedabideetara gerturatzen
Galdegazte, Debagoieneko DBH 3. eta 4. mailako, eta Batxilergoko lehen mailako gazteei zuzendutako komunikazio proiektua da. Oraingoa, 2022-2023 ikasturtekoa, bederatzigarren edizioa izango da. Eskualdeko hamar ikastetxeren eta Goiena Komunikazio Taldearen arteko elkarlan proiektua da Galdegazte, Debagoieneko Mankomunitatearen, eta udaletako euskara zerbitzuen laguntzaz antolatzen dena. Gazteendako propio sortutako eta gazteekin landutako egitasmoa da, haien sormena eta autonomia sustatzeko. Gazteak euskarazko hedabideetara erakartzeko helburua du.
Egitasmoaren hiru faseak
Urtarrileko formakuntza-saioekin ekin zaio aurtengo Galdegazte saioari. Imanol Beloki hurbildu da proiektuan parte hartuko duten eskualdeko ikastetxeetara. Eta bertan, ordubete inguruko aurkezpen-saio bat egin du. Horretan azalduko zien ikasleei zer den Galdegazte, zer den Goiena Komunikazio Taldea, zer den kazetaritza eta komunikazioa, nola egiten den kazetaritza, nola komunikatzen den gaur egun, sare sozialen garrantzia, grabaketetan kontuan hartu beharrekoa…
Formakuntzen ostean, hau da, behin ikastetxeetako aurkezpen saioak amaituta, ikastetxe bakoitzak aukeratuko ditu telebistako saioan parte hartuko duen ikasleen seikotea –hiru platoan aritzeko eta beste hiru kontrol gelan–. Horrekin batera, elkarrizketatu posibleak zerrendatu dituzte; hiru izen proposatu dituzte, eta lagungarri gisa, Debagoieneko pertsona ezagunen zerrenda osatu du Goienak. Behin horiek aukeratuta, gidoia prestatzeko eta Goienako egoitza bisitatzeko eta bertan egiten dena bertatik-bertara ezagutzeko hitzordua egin da.
Urrats horiek emanda, grabaketak hasi dira, eta, guztira, hamar saio izango dira ikusgai. Gaurtik hasita, eguenetan, 21:30ean eta 23:30ean Goiena telebistan.