Eusko Jaurlaritzako Osasun Sailak emandako datuen arabera, lau positibo atzeman dituzte Debagoienan azken astean, aurrekoan baino bat gutxiago. Arrasaten hiru hauteman dituzte eta Bergaran bat. Bailarako kasuen beheranzko joera, beraz, agerikoa da, azken hilabetean kopurua ez baita bostetik gora igo aste batean ere.
Dena den, Arabako, Bizkaiko eta Gipuzkoako datua aztertuz gero, igo egin dira kasuak azken astean. 274 erregistratu zituzten pasa den astean, eta azkeneko honetan 306 izan dira; alegia, 32 gehiago.
Ospitaleetako egoerak, aldiz, berdintsu jarraitzen du. Gaur-gaurkoz, 68 pertsona daude ospitaleratuta eta horietatik zortzi daude zainketa intentsiboetako unitatean; aurreko astean, 72 eta zortzi ziren. Horrez gain, lau pertsona hil dira COVID-19aren ondorioz.