Adinberri Gipuzkoako Foru Aldundiaren estrategia berritzailea garatzen duen fundazioa da, zahartze osasuntsua bermatzeko berrikuntza-potentziala maximizatzen duena. Bi milioi euroko aurrekontuarekin, Adinberrik bultzatzen dituen ildoen helburua da, alde batetik, silver economy-ren eremuan aukera berriak bultzatzeko proiektuak sustatzea, eta, bestetik, adinekoen zaintza hobetzera bideratutako proiektu berritzaileak sustatzea. Ildo horretan, Markel Olano Gipuzkoako diputatu nagusiak Gipuzkoak zahartzearen eremuan duen potentziala azpimarratu du, fenomeno horri heltzeko modua eraldatzen ari dena. "Adinberrik lurraldea aktibatu du, hirugarren sektoreari lotutako eragileetatik hasi eta ezagutzaren eta berrikuntzaren eremuetaraino, eta alde bakoitza soluzio berritzaileen bilaketan konprometitu du".
Hautatutako 24 proiektuen aurkezpenean, diputatu nagusiak, Rakel San Sebastián Adinberri Fundazioko zuzendariak eta Jabier Larrañaga eta Maite Peña Ekonomia Sustapeneko eta Gizarte Politiketako diputatuek lagunduta, lurraldea zahartzearen eta zainketen eremuan ematen ari den aldaketa nabarmendu du: "Guztion artean, adinekoak eta mendekoak artatzeko modua eraldatzen ari gara, eta, aldi berean, potentzial handiko sektore ekonomiko berri bat sustatzen ari gara. Gipuzkoako potentzial berritzailea zahartze osasuntsuaren zerbitzura jartzeko helburuarekin abiatu zen Adinberri, eta hori da, hain zuzen ere, laguntza lerro honen helburua".
Debagoieneko lau proiektu
Hautatutako proiektuen artean daude, Silver economy atalean, Auzo Lagunen Aise Jan eta Fagor Healthcare-n Medhome/Zaintza Etxean. Lehena etxez etxeko sukaldaritza-eskaintza pertsonalizatu bat diseinatzean datza, adineko pertsonen nutrizio-premietara egokitua, ulertzen baita nutrizio egoki batek modu erabakigarrian laguntzen duela pertsona horien osasunean, ongizatean eta bizi-kalitatean. Bigarrenak, berriz, mendekotasuna duten pazienteei sendagaiak etxean entregatzeko zerbitzu berri bat emango die. Irtenbide independiente bat da, paziente polimedikatuaren beharretara egokitzen diren hainbat aukera konfigura ditzakeena, pazientea dagoen lekuan agindutako tratamenduarekiko atxikidura hobetzeko. Sistema eramangarri eta erraza da, laguntza-sarearekin denbora errealean elkarreragiteko aukera ematen duena.
Zainketa arloari dagokionez, Isea enpresaren Eco Co-Housing Intergeneracional Politta delakoak jasoko du dirulaguntza. Aukera-eremuetan jarduera ekonomikoa sustatzera bideratutako proiektu bat da, Gipuzkoako zahartze-mailek planteatzen duten aldaketa sozialetara egokitutako belaunaldi arteko Eco Co-Housing bat diseinatuz. Aretxabaletako Udalari ere egingo diote ekarpen ekonomikoa, Aretxabaletako zentro soziosanitariorako gobernantza-eredu bat garatzeko, gizarte-zerbitzuetako langileak zein osasun-arlokoak programa soziosanitarioetan modu integratuan txertatuko dituena.