Eguraldiak okerrera egin du azken orduetan, eta Euskalmetek abisu horia ezarri du euriteengatik Kantauri isurialdean, 15:00etan hasi eta eguazten gauerdira arte, hain justu. Emandako informazioaren arabera, litekeena da 24 orduan 60l/m² euri pilatzea leku batzuetan, aurreikuspenek euria gogotik egingo duela baitiote, batez ere kostaldean eta mendebaldean.
Eguaztenerako, ordea, abisu laranja ere ezarri dute, elurra egitea espero baita 300-400 metro inguruan. Alabaina, Euskalmetek ohartarazi du balitekeela maila baxuagoan ere elurra egitea. Are, trumoi-ekaitzak eta txingorra ere protagonista izan daitezke.
Protokoloak martxan
Iragarpen horiek direla-eta, Eskoriatzako Udalak elur-protokoloa aktibatu du, bereziki elizateei dagokienez. Eta Elgetako Udalak ere aholku batzuk eman ditu. Hain justu, gomendatu du autoa "behar-beharrezkoa" bada soilik erabiltzeko eta autoa aparkalekuetan zuzen uzteko. Are gehiago, jakinarazi du udaletxeko arkupean palak eta gatza egongo direla.
