Arizmendiko Almen ikastolako DBH-2ko ikasleak ikusmen murriztuaren inguruko proiektu batean murgildu dira aste honetan. Proiektuaren helburu nagusia da ikusmen murriztua zer den ikastea eta honen inguruan ikertzea eta kontzientzia hartzea, eta, horretarako, ikasleak Begisare elkartearekin harremanetan egon dira.
Landu duten proiektuaren inguruan hitz egiten aritu dira ikasleak, antolatu duten prentsaurreko batean, Gorka Gabilondo irakaslearen laguntzarekin. DBH-2ko ikasleen bozeramaile aritu dira Lide Guenetxea, Jare Berezibar, Gillen Urkia eta Oier Aranegi.
Astelehenean begisare elkartekoen hitzaldia izan zuten, gaur –asteazkena– Aretxabaletan izan dira ikasleak gaiaren inguruan ikertzen eta txostena egiten, eta bihar, jaso dutenaren berri emango diote Aretxabaletako Udalari. Amaitzeko, ostiralean -urriak 21-, Begisare elkartearekin batera karpa bat jarriko dute Aretxabaletako Mitarte kalean. Hainbat jolas antolatu dituzte ikusmen murriztua duen jendeak egunerokotasunean izaten dituen zailtasunen inguruan kontzientzia hartzeko. Gainera, borondatearen truke txapak salduko dituzte eta bildutako diru guztia Begisare elkartera bideratuko da.
Ikusmen murriztuaren inguruan ikertu dute
Prentsaurrekoan, ikusmen murriztuaren inguruko datu batzuk ere eman dituzte. Itsutasuna baino maila bat beherago dagoen gaitza da, eta, beraz, betaurreko edo ebakuntzekin ezin daiteke zuzendu. Itsutasuna baino maizago gertatzen den arren, ez da hain ezaguna eta askotariko gaixotasunak sailkatu daitezke ikusmen murriztu gisa; besteak beste, fotofobia, petatxuz beteriko ikusmena, gaueko itsutasuna eta ikus eremuaren galera dira gaixotasun horietako batzuk. Hori dela eta, ikasleen hitzetan: "Aretxabaletako herritarrak animatzen ditugu jarriko dugun karpatik pasatzera eta saltzen ditugun txapa solidarioak erostera".