Joan zen astetik tenperatura altuak zeuden iragarrita uztaileko bigarren aste honetarako, eta iragarpenak betetzen ari dira. Hala, Euskal Meteorologia Agentziak lau alerta egoera ezarri ditu bailararako; bi eguaztenerako, uztailak 13, eta beste bi egunerako, uztailak 14.
Bihar tenperatura altuak espero dira egun osoan zehar; hala, alerta horia ezarri du Euskalmetek, termometroak 17 eta 37 graduren artean izango baitira. Horrez gain, bigarren abisu egoera arratsaldeko 13:00etik 19:00etara dago aurreikusita, muturreko tenperatura oso altuengatik. Eguenari dagokionez, antzeko iragarpena egin du meteorologia agentziak. Egun osoko abisu horiak bere horretan jarraituko du; 14:00etatik 20:00etara espero da, ordea, muturreko beroa.
Etenik ez
Euskal Meteorologia Agentziak alerta egoerak bi eguneko aurrerapenarekin ezartzen dituen arren, aurreikuspenen arabera bero olatuak ez du etenik izango eguenetik aurrera ere. Astebururako, esaterako, 35 graduren bueltako maximoak espero dira, eta litekeena da datorren martitzen edo eguaztenera arte balio altuenek beherakada nabarmenik ez izatea.
