Tenperatura altuengatik jarritako hainbat alerta egoerekin amaitu da udaberria, eta gaur goizeko 11:14an udan sartu arren, Euskal Meteorologia Agentziak ezartzen dituzten abisuek ez dute etenik izango. Eguraldi euritsua aurreikusi dute iragarleek datozen egunetarako, eta bide horretan, abisu horia ezarri dute goizalderako prezipitazio handiengatik. Metro karratuko 1,5 litro bota ditzake, aurreikuspenen arabera.
Zehazki, gauerditik eguazten goizera (9:00) ezarri dute alarma egoera. Zaparrada trumoitsuak daude aurreikusita, "handiak" zenbait tokitan Euskalmeten arabera, eta kazkabarra ere bota dezake han-hemenka. Horrez gain, ekaitz guneetan haize-boladak "gogorrak" izan daitezke.
Ezegonkorra
Datozen egunetarako eguraldi ezegonkorra dago iragarrita; ostarteak zaparradekin uztartuko dira aste osoan zehar. 10-15 graduren bueltako tenperatura minimoak espero dira, eta nekez helduko dira termometroak 25 graduetara.