Azken hilabeteko kutsatu kopuru altuena zenbatu zen joan zen astean: 133

Jon Irizar Aranguren 2022ko eka. 20a, 13:55

Duela bi aste baino 42 kasu gehiago atzemanda, maiatzeko bigarren astetik izandako baliorik altuena da azken zazpi egunetakoa. Gora egin du intzidentzia-tasak ere: 349,96. Araba, Bizkaia eta Gipuzkoako ospitaleetan, baina, egoera ez da aldatu; 300 herritarretik gorak behar izan dute egunero osasun arreta, eta horietako dozena inguruk, berriz, zainketa intentsiboa. 

Eusko Jaurlaritzako Osasun Sailak egoera epidemiologikoaz egindako eguneraketaren arabera, azken astean maiatzeko bigarren astetik hautemandako positibo kopuru handiena zenbatu da bailaran: 133. Duela bi aste baino 42 kasu gehiago dira, baita otsaila erdialdetik izandako bosgarren asterik makurrena ere.

Herrikako balioei erreparatuz, bada datu adierazgarri bat: hiru kasutik bi Arrasate edo Bergaran izan dira. Bietan duela bi aste baino hamahiru kasu gehiago atzeman dira; orotara, 58 eta 32, hurrenez hurren. Gora egin dute positiboek Antzuolan, Aretxabaletan, Eskoriatzan eta Oñatin ere.

  • Grafiko eta datu guztiak ikusgai daude goiena.eus-eko azken datuak atalean.

Gerturatzen

Azken asteetan Araba, Bizkaia zein Gipuzkoako balioen azpitik izan da bailarako intzidentzia-tasa. Kasu berrien gorakadaren ostean, baina, 349,96ra igo da tasa; Arabako balioa baino altuago (317,68), eta Bizkaia (379,97) zein Gipuzkoako (367,13) balioetatik gertu. Martxoa erdialdetik, Nafarroa da tasarik altuena duen Hego Euskal Herriko probintzia –eguaztenean eguneratuko ditu Nafarroako Gobernuak azken asteko datuak–.

Aldaketarik ez

Eusko Jaurlaritzaren eskumena diren erietxeetan apenas aldatu da egoera iragan astetik hona. Bataz beste 327 herritar egon ziren ospitaleratuta; 307 gutxienez –astelehena eta egubakoitza– eta 355 gehienez –domeka–. Zainketa intentsiboa behar duten herritarren artean ere ez da gorabehera aipagarririk izan; hots, 10-12 herritar inguruk behar izan dute egunero arreta berezia.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak