Asteburu ezegonkorraren ostean, goranzko joera hartu dute termometroek astea hastearekin batera, eta bilakaerak ez du etenik izango datozen orduetan. Euskal Meteorologia Agentziaren arabera, 35 graduen langa igaroko dute termometroek astean zehar. Hala, abisu horia ezarri dute martitzen eta eguaztenerako tenperatura oso altuengatik.
Goizean goizetik "hego-osagaiko haizea" izango da, eta egunak aurrera egin ahala helduko dira maximoak. Bi egunetan ordu tarte berdinerako ezarri dute alerta egoera: 14:00etatik 18:00etara. Bazkalosteko muturreko tenperaturen ostean –38 gradu espero dira, adibidez, Arrasaten–, termometroak jaisten lagun dezaketen "zaparrada trumoitsuak bota ditzake". Hala ere, iluntzean ez dira 25 gradutik beherako tenperaturak aurreikusten.
Etenik ez
Abisu horiak martitzen eta eguaztenerako ezarri ditu Euskal Meteorologia Agentziak, bi eguneko aurrerapenarekin ematen baitute muturreko fenomenoen berri. Iragarpenen arabera, baina, eguen eta egubakoitzean egoerak ez du hobera egingo; hots, litekeena da asteburura bitarte tenperatura altuek etenik ez izatea.