Espainiako Enplegu Zerbitzuak emandako datuen arabera, behera egin du langabeziak maiatzean Debagoienean. Langile aktibo gisa izendatuta dauden 30.683 herritarretik 2.339 zeuden lanik gabe urteko bosgarren hilabetea amaitzean, apirilean egoera berean zeuden herritar kopurua baino 80 gutxiago. Aretxabaleta eta Elgeta izan dira langabeek gora egin duten bailarako herri bakarrak; apirilean baino zortzi eta bi herritar gehiago zeuden langabezian, hurrenez hurren.
Hala, langabezia tasa %7,62an da, azken 17 hilabeteetan izan den baliorik baxuenean. Bilakaerari erreparatuta, baina, joan zen urteko joera berdintsua atzeman liteke grafikoan; 2021eko martxoan eta apirilean apenas egon zen aldaketarik, eta maiatzean, aldiz, behera egin zuten langabeek. 2022an ere antzeko bilakaera izan dute balioek. %0,46ko jaitsiera izan zuten orduan; %0,26an egin du behera aurten.
Arrakala handituz
Espainiako Enplegu Zerbitzuak eguneratzen dituen datuek ertzei erreparatzeko aukera ere eskaintzen dute. Besteak beste, sektoreka eta generoka xehatzen dituzte langabeak –eguneraketa hau ez dute hilabeteko lehen egunetan egiten, beranduago baizik–. 2022ko apirilekoak dira aldagai hauek biltzen dituzten azken balioak.
Grafikoan ikusi daitekeen bezala, geroz eta handiagoa da langabezian dauden gizonezkoen eta emakumezkoen arteko arrakala Debagoienean. 2005eko datuak dira Espainiako Enplegu Zerbitzuak eskaintzen dituen lehenak; bailarako hamar langabeetatik sei emakumezkoak ziren orduan. 2008tik 2014ra berdintzen joan ziren balioak, baina geroztik, gora egin du emakumeen ehunekoak. Apirilean, esaterako, azken 14 urteetako arrakala handiena izan da. Zehazki, Debagoieneko 2.419 langabeetatik 1.381 ziren emakumezkoak (%57,08), eta 1.038, aldiz, gizonezkoak (%42,92).