Espainiako Enplegu Zerbitzuak eguneratutako datuen arabera, gora egin du langabeziak apirilean Debagoienean. Urteko laugarren hilabetearen amaieran, bailarako 30.683 herritar aktiboetatik 2.419 zeuden lanik gabe –2.503 ziren Hego Euskal Herrian–; zehazki, lanerako prest dauden debagoiendarren %7,88a. Otsailetik martxora izandako gorakada nabarmenaren ostean (+110), hutsala izan da azken hilabeteko igoera (+3). Hala ere, 2022an izandako daturik okerrena da.
Herrikako datuei erreparatuz gero, Bergara, Aretxabaleta, Elgeta eta Aramaio izan dira goranzko joera orokorreko salbuespenak; hamalau bergarar, aretxabaletar bat eta elgetar bat gutxiago daude langabezian, eta hirugarrenaren kasuan, aldiz, mantendu egin da datua (2). Gainerako herri guztietan, aldiz, gora egin dute langabeek, igoera esanguratsurik izan ez duten arren.
2021ean baino hobeto
Datuei perspektiba zabalago batetik begiratuz gero, baina, posible da bestelako irakurketa bat egitea. Izan ere, duela urtebete baino 79 herritar gutxiago daude langabezian bailaran –19.747 gutxiago Hego Euskal Herrian–, eta 2021eko uztailean soilik zenbatu ziren igaro berri den apirilean baino langabe gutxiago. 2021eko urtarrilean, esaterako, egun daudenak baino 269 langabe gehiago zeuden bailaran.