Domekako giro eguzkitsuak jarraipena izango du gaur, astelehena. Hala ere, azken egunekin alderatuta bada asteko lehen egun honetan Debagoienean presente izango dugun beste faktore meteorologiko bat: haizea. Euskal Meteorologia Agentziak atzo iluntzean ezarri zuen abisu horia, eta gaurko eguna amaitu bitarte indarrean egongo da alerta egoera.
Aurreikuspenen arabera, hego-ekialdeko haize boladek 100 kilometro ordutik gorako abiadak izango dituzte haizeguneetan; haizeguneak ez diren tokietan, aldiz, 80 kilometro ordutik gorakoak izango dira ufadak. Arratsaldean indarra galduko duen arren, gauerako bolada handiak espero dira berriz ere.
Baso-suteak
Haizearen eta 25 gradu inguruko tenperatura maximoen erruz, beste abisu hori bat ere ezarri du Euskalmetek: baso-suteena. Adituek arrisku nagusia Kantauri isurialdean egon litekeela aurreikusi dute, baina Gipuzkoa barnealdea ere arrisku gune gisa identifikatu dute; tartean, Debagoiena.