Osiñako zubian biribilgunea egiteko egiten ari diren lanak medio, zubia trafikoari moztuta egongo da gaur eta bihar. Hainbat ondorio izango ditu Arrasate erdigunerako sarbideetan; Aretxabaletako, Bedoñako edo Musakolako sarbideak erabili beharko dira herri erdigunera joateko. Era berean, Elorregirako noranzkoan ere zabalik egongo da Nafarroa etorbidea bi egunetan.
Geltoki gutxiago
Lurraldebuseko autobusak ere izango dituzte albo-kalteak; izan ere, ohiko pasabidea da Osiñako zubia zerbitzu askorentzat. Hona, zehazki, ibilbidea moldatuko duten sei lineak, eta bakoitzari dagozkion aldaketak:
- DG01 (Arrasate > Oñati > Bilbo): Musakolako geltokia kenduko da bi noranzkoetan. Ondorioz, Ospitaletik San Prudentziora –edo alderantziz– egingo du zuzenean.
- DG02 (Bergara > Oñati > Arrasate > Durango > Bilbo): Musakolako geltokia kenduko da bi noranzkoetan. Ondorioz, Ospitaletik Elorriora egingo du zuzenean Bizkaia aldera doanean, eta Ospitaletik San Prudentziora, aldiz, Bergarara edo Oñatira doanean.
- DG05 (Gasteiz > Arrasate > Eibar): Musakolako geltokia kenduko da bi noranzkoetan. Ondorioz, Ospitaletik Eroskiko geltokira –edo alderantziz– egingo du zuzenean.
- DG10 (Bergara > Arrasate > Aretxabaleta > Eskoriatza): Musakolako, Ospitaleko eta Erdiguneko geltokiak kenduko dira Eskoriatzarako noranzkoan; ondorioz, Eroskitik San Andresera egingo dute zuzenean autobusek. Bergarako noranzkoan, aldiz, Musakolako geltokian soilik ez da geldituko.
- DG11 (Eibar > Arrasate): Musakolako, Ospitaleko eta Erdiguneko geltokiak kenduko dira Arrasatera iristean; ondorioz, Eroskitik San Andresera egingo dute zuzenean autobusek. Eibarrerako noranzkoan, aldiz, Musakolako geltokian soilik ez da geldituko.
- DG04 (Arrasate > Oñati > Legazpi > Zumarraga): Musakolako, Ospitaleko eta Erdiguneko geltokiak kenduko dira Arrasatera iristean; ordainetan, San Andresen egingo dute ezohiko geldialdia autobusek lanek iraun bitartean. Zumarragarako noranzkoan, aldiz, Musakolako geltokian soilik ez da geldituko.
