Atzo bildu zen Espainiako Osasun Publikoko Batzordea egoera epidemiologikoa aztertzeko eta neurri murriztaileez eztabaidatzeko. Bilera amaitu berritan Osasun Ministerioak jakitera eman zuenez, zapatutik aurrera indarrean zegoen prebentzio arau bat bertan behera geldituko da: gaitza atzeman zaien herritarren kontaktu estuek ez dute berrogeialdirik egin beharko.
Aste batzuk igaro dira txertatuta zeuden herritarrek berrogeialdirik egin behar ez zutela adierazi zutenetik; ondorioz, txertatu gabe dauden biztanleengan du eragina atzo hartutako erabakiak. Ministerioaren arabera, erabaki honek bereziki ikastetxeetan izango du eragina, kontaktu estuen etxeratzeen protokoloa bertan behera geldituko baita.
Zuhurtzia eskaera
Neurriak neurri, zuhurtziarako deia egin zuten arduradunek. Positibo baten kontaktu estua den herritarrari hamar egunetan "kontuz ibiltzeko" deia egin zioten, prebentzio neurriak zorroztuz; musukoa erabiltzea, pertsona zaurgarriekin harremanak murriztea edota kanpo jarduerak mugatzea, besteak beste.