"Egunero zapaltzen, erasotzen eta erailtzen gaituen sistema heteropatriarkal, kapitalista, arrazista, kapazitista hau kiskali nahi dugu". Bide horretan ekin diote Euskal Herriko Mugimendu Feministako hainbat kidek Iruñeko Gaztelu Plazan egin duten agerraldiari. Sare sozialetan partekatu duten irakurketan ikusi daitekeenez, martxoaren 8ko aldarriak izan dituzte ahotan, deialdi nagusiak jakitera emateaz gain.
"Bizitzea merezi duen mundu bat" eraikitzeko indarrak batu nahi izan dituzte, norabide zehatz bat aldarrikatuz: "Feminismoa da bidea". Horrek, baina, "bizitza politizatzea" eskatzen duela adierazi dute, "egunerokotasuna borroka eremu bihurtzea", alegia. Euskal Herriko Mugimendu Feministak antolatzeko deia egin nahi izan du, "elkarrekin, indartsu eta batuta" diskurtso faxistei, misoginoei, homofoboei eta sexistei "argi eta ozen" adierazteko "aurrean izango gaituztela eta ez direla pasako".
Mobilizazioak hiriburutan
"Anitza eta emakume* guztiei irekia" izan behar den feminismoa lortu nahian, martxoaren 8an zentro eta periferia guztietan mobilizatzeko deia egin dute. Iruñeko agerraldian Euskal Herriko bost hiriburuetako mobilizazioak iragarri dituzte; Baionakoa, Bilbokoa, Gasteizkoa, Donostiakoa eta Iruñekoa, hain zuzen. Ez dira, baina, mobilizazio bakarrak izango.
Agerraldia astelehenean
Gaurko aurkezpenaren harira, bailarako mugimendu feministek agerraldia deitu dute hilaren 28rako, astelehena. Elorregin elkartuko dira arratsaldeko 18:30etan, eta "emakume*" guztiei irekitako deialdia da.
