Neurri murriztaileak izan dira azken egunetako albiste Hego Euskal Herrian; gaurtik aurrera EAEn eta bihartik aurrera Nafarroan, bertan behera geldituko dira indarrean zeuden neurri ia guztiak. Egoera epidemiologikoa adierazten duten datuek erabaki politikoen bidea jarraitzen dute, heriotza kopura salbu.
Debagoienean, esaterako, 306 kasu hauteman dira; 2021eko azaroaren 29ko datuen eguneratzetik izan den asteko datu kopuru baxuena. Aurreko asteko datuekin erkatuta, 263 herritar gutxiago kutsatu dira. Gatzaga izan da gora egin duen herri bakarra (+2), eta jaitsiera adierazgarriena, berriz, Arrasaten ikusi liteke (-135).
- Grafiko eta datu guztiak ikusgai daude goiena.eus-eko azken datuak atalean.
1.000ra gerturatzen
Intzidentzia-tasaren bilakaera ere beheranzkoa da; 643 puntuan jaitsi da egueneko datuen eguneratzetik, eta 1.350,12an da. Bailarako egoera epidemiologikoaren mapa gorrian dagoen arren, badira beste eremu edo kolore batera hurbiltzen ari diren herriak. Elgetako tasa, esaterako, 795,76an da, eta Debagoieneko bataz bestekotik behera daude Antzuola (1.147,32), Oñati (1.281,83) eta Arrasate (1.290,64).
223 hildako
Ospitaleetako eta ZIUetako egoera hobera doa; 598 herritar daude erietxeetan, horietatik 96 Zainketa Intentsiboen Unitateetan. Txanponaren beste aldean, baina, azken astean Hego Euskal Herrian zendu diren herritar kopurua dago. Araba, Bizkaia eta Gipuzkoan gaitza zuten 203 lagun hil dira, eta Nafarroan, berriz, 20.
