Euskal Meteorologia Agentziak egindako iragarpenen arabera goizak siku eutsiko duen arren, bazkalostean itzuliko dira prezipitazioak bailarara. Modu adierazgarrian izan ez arren, pronostikoak dio tenperaturak ere behera egingo duela. Euria eta hotza elkartzean, beraz, ezaguna da ondorioa.
Eusko Jaurlaritzako Segurtasun Sailak abisu horia ezarri du elurragatik. Gaur arratsaldeko 18:00etatik bihar goizeko 09:00etara egongo da indarrean "Arabako erdialdean, Ebro ondoko eskualdean, Bizkaiko barnealdean eta Gipuzkoako barnealdean"; beraz, baita Debagoienean ere.
800-900 metrotara
Elur-kota, baina, ez da 2021eko azaroko azken asteburuko mailetara jaitsiko. Iragarpenek diotenez, 800-900 metrotara egingo du elurra "arratsalde-gauean", eta orduek aurrera egin ahala igotzen joango da kota, bihar goizerako 1.000 metrotik gora kokatuz.