Gaur eguneratu ditu Gipuzkoako Foru Aldundiak probintziako adinekoen egoitzetako egoera epidemiologikoari buruzko datuak. Orotara, 300 positibo berri zenbatu dira azken zazpi egunetan, aste bat lehenago baino 81 gutxiago. Hildakoei dagokionez, 7 izan ziren zenduak urtarrilaren 18aren eta 25aren artean; 4 izan dira, aldiz, azken astean.
Bilakaera bera atzeman liteke bailarako egoitzetan ere. Aretxabaletako Debagoiena (10) eta Arrasateko San Juan de Dios (4) eta Iturbide (1) egoitzetan soilik hauteman dira kasu berriak. Guztira 15 egoiliar berri kutsatu arren, urtarrilaren 18aren eta 25aren artean kutsatutako egoiliarren erdia baino ez da. Gainera, eta pasa den astean Mizpirualden heriotza bat izan ostean, ez da inor zendu gaitzak eraginda bailaran.
Sendatuak gora
Gipuzkoako adinekoen egoitzetan gaitza pasa duten egoiliar kopurua da bilakaeraren beste adierazle garbi bat. Kasu honetan, Aldundiak 349 herritar zenbatu ditu sendatu gisa, horietatik 25 bailarakoak.
