Duela aste batzuk goia jo ostean, COVID-19aren seigarren olatuak beheranzko joera hartu duela esan liteke; bai, behintzat, positibo, intzidentzia-tasa eta ospitaleetako egoerari erreparatuz gero. Izan ere, azken zazpi egunetan (1.069) urtarrilaren 13 eta 19aren artean (1.250) hautemandako kasuak baino 181 positibo gutxiago zenbatu dira bailaran. Leintz-Gatzaga izan da joera hori hautsi duen bakarra, bikoiztu egin baita astebeteko epean gaitza atzeman zaien herritar kopurua.
- Grafiko eta datu guztiak ikusgai daude goiena.eus-eko azken datuak atalean.
4.000tik behera
Datuen beherakada horren beste adierazle argi bat intzidentzia-tasarena da. Grafikoan ikusi daitekeen bezala, Hego Euskal Herriko lurralde guztiak beheranzko joeran daude; Nafarroa da uneotan tasa altuena duena (4.263,25), eta Bizkaia, aldiz, baxuena duena (3.272,46). Debagoiena ere zaku berean sartu liteke. Duela aste batzuk goia datu orokorrak baino gorago jo ostean, beheranzko joera ere adierazgarriagoa izaten ari da bailaran; hots, hiru egunean ia 800 puntuan jaitsi da intzidentzia-tasa (3.578,21), eta duela bi aste Osasun Sailak ezarritako protokolo berriarekin lehen datuak kaleratu zituztenetik, aldiz, ia 3.000 puntuan.
Tantaka-tantaka
Ospitaleen egoera ere hobetuz doa, jaisten ari baitira, tantaka-tantaka, erietxeetan zein Zainketa Intentsiboen Unitateetan daudenen kopuruak. Uneotan, 905 herritar daude Hego Euskal Herriko erietxeetan, eta 129, berriz, ZIUetan. Duela astebeteko datuekin alderatuz gero, 93 eri gutxiago daude ospitaleetan, eta 26 gutxiagok behar dute zainketa berezia.