Gipuzkoako Foru Aldundiak gaur eguneratu du adinekoen egoitzetako egoera epidemiologikoa. Gizarteko datu orokorrekin ikusi daitekeen bezala, kutsatzeek beheranzko joera hartu dutela esan liteke; bai, behintzat, bailaran. Adibide gisa, duela bi aste 43 kasu berri hauteman ziren; pasa den astean 35; aste honetan, berriz, 30. Oraingoan, gainera, hiru zentrotan banatu dira kutsatzeak: 24 izan dira Aretxabaletako Debagoiena egoitzan, eta hiruna, aldiz, Arrasateko San Juan de Diosen eta Oñatiko San Martinen.
Datu makurrena, baina, heriotzena da. Izan ere, zazpi egoiliar hil dira azken astean Gipuzkoako egoitzetan, eta horietako bat Bergarako Mizpirualde egoitzako egoiliarra zen. Pasa den astean Arrasateko Iturbide egoitzan ere izan zen heriotza bat, eta 2021eko azaroaren 29az geroztik, 22 izan dira gaitzak jota probintzian hil diren egoiliarrak.
Ia ehun sendatu
Datu guztien artean, baina, bada positibotzat izendatu litekeenik ere. Hots, azken zazpi egunetan 95 egoiliarrek gainditu dute gaitza bailaran; zehazki, 40k Debagoiena egoitzan (Aretxabaleta), 19k San Martingo zentroan (Oñati), 14k Jose Aranan (Eskoriatza), 12k Iturbiden (Arrasate), eta bostek Mizpirualden (Bergara) zein Benito Mennin (Arrasate).
